Rəhbərlik

directory1

Aydın Münsüf oğlu İbadov

İdarə Heyətinin sədri

1959-cu ildə Bakı şəhərində ziyalı ailəsində doğulub. Azərbaycan İnşaat Mühəndisləri İnstitutunun "İnşaat mühəndisliyi" fakültəsini bitirib. Ali təhsilini başa vurduqdan sonra 1981-ci ildə hərbi xidmətə yollanıb. Əmək fəaliyyətinə 1984-cü ildə "Azərnəqliyyattikinti" trestində mühəndis kimi başlayıb. 1991-ci ildə Azərbaycanda yeni formalaşmağa başlayan reklam biznesinin təməlini qoyanlardan biridir. Bir sıra qlobal şirkətlərin Azərbaycandakı nümayəndəliklərində çalışıb, yerli reklam şirkətlərinə rəhbərlik edib. 2012-2016-cı illərdə Rusiya Federasiyasının Moskva şəhərində sahibkarlıq fəaliyyəti ilə məşğul olub. 2017-ci ilin iyun ayından etibarən Azərbaycan Respublikası Prezidentinin müvafiq Sərəncamına əsasən Azərbaycan Respublikası Dövlət Reklam Agentliyinin direktoru, 2019-cu il 16 oktyabr tarixli Sərəncam ilə Azərbaycan Respublikası Dövlət Reklam Agentliyinin İdarə Heyətinin sədri təyin olunub. Azərbaycan Respublikası Prezidentinin 2019-cu il 27 may tarixli Sərəncamı ilə “Azərbaycan Xalq Cümhuriyyətinin 100 illiyi (1918-2018)” yubiley medalı ilə təltif edilib. Azərbaycan Respublikasının Dövlət Dil Komissiyasının üzvüdür. Ailəlidir, 2 övladı var.

directory1

Fəxri Rafiq oğlu Abdullayev

İdarə Heyətinin sədr müavini

21.09.1974-cü ildə Bakı şəhərində anadan olub. Bakı Dövlət Universitetinin “Coğrafiya”, Azərbaycan Respublikası Prezidenti yanında Dövlət İdarəçilik Akademiyasının “Dövlət və bələdiyyə idarəetməsi” fakültələrində ali təhsil alıb. Əmək fəaliyyətinə Rusiya Federasiyasının Soçi şəhərində başlayıb. Sonra Azərbaycanda dövlət səviyyəsində təşkil edilən tədbirlərin əsas təşkilatçılarından olub. Fəxri Abdullayev bir müddət sahibkarlıq fəaliyyəti ilə məşğul olduqdan sonra 2013-cü ildən Azərbaycan Respublikasının Nazirlər Kabineti yanında Dövlət Bayrağı Meydanı Kompleksi İdarəsinin rəis müavini, daha sonra Dənizkənarı Bulvar İdarəsinin Aparat rəhbəri vəzifələrində çalışıb. İşlədiyi dövrdə ona dövlət qulluğunun müşaviri ixtisas dərəcəsi verilib. 2017-ci ildə Azərbaycan Respublikası Dövlət Reklam Agentliyinin direktor müavini, Azərbaycan Respublikası Prezidentinin 2019-cu il 30 oktyabr tarixli Sərəncam ilə isə Agentliyin İdarə Heyətinin sədr müavini təyin olunub. Ailəlidir, 3 övladı var.

directory1

Orxan Bəxtiyar oğlu Əliyev

İdarə Heyətinin sədr müavini

27.11.1986-cı ildə Ağdam şəhərində anadan olub. Azərbaycan Dövlət İqtisad Universitetinin “Beynəlxalq Əlaqələr” fakültəsini və adı çəkilən ali təhsil ocağının “Biznesin idarə edilməsi” fakültəsinin magistr dərəcəsini fərqlənmə ilə bitirib. “City University London”da “İqtisadiyyatın tənzimlənməsi və rəqabət” fakültəsində magistr təhsili alıb.Əmək fəaliyyətinə bank sektorunda başlayıb. Sonra işini Rabitə və İnformasiya Texnologiyaları Nazirliyində, ARDNŞ-ın Gürcüstan nümayəndəliyində davam etdirib. 2017-ci ilə qədər Rabitə və Yüksək Texnologiyalar Nazirliyinin tabeliyində İnformasiya Texnologiyalarının İnkişafı Dövlət Fondunda icraçı direktorun müavini vəzifəsində çalışıb. İşlədiyi dövrdə ona dövlət qulluğunun kiçik müşaviri ixtisas dərəcəsi verilib. 2017-ci ildə Azərbaycan Respublikası Dövlət Reklam Agentliyinin direktor müavini, Azərbaycan Respublikası Prezidentinin 2019-cu il 30 oktyabr tarixli Sərəncam ilə isə Agentliyin İdarə Heyətinin sədr müavini təyin olunub. Ailəlidir, 1 övladı var.

 

directory1

Aydın Bəşir oğlu Bəşirov

Aparatın rəhbəri

01.04.1961-ci ildə Ağcabədi rayonunda anadan olub. S.Ağamalıoğlu adına Kənd Təsərrüfatı İnstitutunun “İqtisadiyyat” fakültəsində ali təhsil alıb.Əmək fəaliyyətinə Avtomobil Təmiri Zavodunda başlayıb. Sonra Bakı şəhəri Əzizbəyov və Nəsimi rayonlarının Vergi Müfəttişliyində vergi müfəttişi, Ağcabədi rayon Vergilər şöbəsinin rəisi vəzifələrində çalışıb. Vergilər Nazirliyi aparatının şöbə rəisi vəzifəsinədək yüksəlib. Azərbaycan Respublikası Dövlət Neft Şirkətində, İqtisadi İnkişaf Nazirliyində, Nazirlər Kabineti yanında Dövlət Bayrağı Meydanı Kompleksi İdarəsi Aparatında şöbə müdiri, “Bakı Metropoliteni” QSC-də idarə rəisi vəzifələrində işləyib. 2017-ci ilin oktyabr ayından Azərbaycan Respublikası Dövlət Reklam Agentliyi Aparatının rəhbəri vəzifəsində çalışır. Ailəlidir, 3 övladı var.