Açıq məkanda reklam yerləşdirmək istəyən sahibkarlar icazələrin alınması üçün Azərbaycan Respublikası Dövlət Reklam Agentliyinin (ADRA) Regional Reklam İdarələri ilə yanaşı iş adamlarına dövlət və biznes xidmətlərinin mərkəzləşdirilmiş qaydada təqdim edildiyi “Bakı KOB evi”nə də müraciət edə bilərlər. Burada xidmətlər operativlik, şəffaflıq, nəzakətlilik və rahatlıq prinsipləri əsasında həyata keçirilir. Sayca 3-cü olan, Nərimanov rayonunda yerləşən “Bakı KOB evi” gün ərzində beş min sahibkara xidmət göstərmək potensialına malikdir. Binada yaradılmış görüş, təlim, startap, mediasiya otaqları və konfrans zalı da sahibkarların xidmətindədir. Ümumilikdə “Bakı KOB evi”ndə sahibkarlara 29 dövlət qurumu tərəfindən 150-dən çox, 20 özəl qurum tərəfindən isə 100-dən çox adda xidmətlər göstərilir.

Azərbaycan Respublikasının Kiçik və Orta Biznesin İnkişafı Agentliyinin (KOBİA) struktur bölmələri olan Xaçmaz və Yevlax şəhərlərindəki kiçik və orta biznes evlərinin (KOB evləri) hər birində də ADRA mütəxəssisləri çalışır. Bu evlərdə indiyədək sahibkarlara 170 mindən çox xidmət göstərilib ki, bu xidmətlərin 165 mindən çoxu dövlət-biznes (G2B), 9 minə yaxını isə biznes-biznes (B2B) xidmətləridir. Sahibkarların KOB evlərinin xidmətlərindən məmnunluq göstəricisi 98 faizdir.